Novel Keling Kumang dalam Bahasa Iban (11)

 

SEKADAU NEWs - SEKADAU: Hari beganti bulan, bulan beganti taun. Sida Tiong Kandang enggau Indai Bungai serumah majak nambah sepengudah orang ti ngaga langkau beserimbai enggau sida.

            Genap anak ti deka idup berumah tangga deka begagaka langkau nampung langkau bukai. Gemuring udah bisi niat deka meri tanah nya ngagai bala menyadi indu iya, lalu Gemuring pulai ngagai rumah asal sida. Palan endur sida belangkau nya ba endur ti tinggi tang semak enggau sungai, langkau sida lalu disebut Gelung, iya nya rumah ti ba tinting tang agi nungga mata panas niki.

            "Ingat nuan kitai ngiga buah engkala?"

"Au ingat!" saut Gemuring. " Nuan niki pun kayu lalu gegetar ketegal takut. Ha…indu berani tang takutka babi!"

         "Ukai takut tang geli, nemu nuan!" saut Bajik Amal enggai alah. Digetil iya lengan aka iya, ukai ketegal benchi tang ketegal sayau. Dalam timpuh ti enda lama, seduai iya deka beserara. Iya berasai sinu ketegal iya deka lenyau aka tuai ti seruran nyaga iya. Enda berasai ai mata iya keberai naya ari mata iya.

"Dikena ngingatka sempekat kitai semenyadi, manah kitai betukar gerunung.”

Gemuring setuju. "Penemu ti naka pemanah!

"Engkala. Ingat nuan ke buah engkala? Nama kebuah aku mai nuan ngambi nya suba?"

         Gemuring mengangkatka bau iya lalu ngilikka pala.

         "Nuan semina nemu nyerang munsuh aja. Reti utai ku aku deka ngaga gerunung baka buah engkala."

          Gemuring nagunka pala.

"Sepasang, baka ti ditikauka nuan labuh ngagai aku suba."

 

            Gemuring nagunka pala nandaka iya setuju. Iya agi nunggu nama agi deka disebut adi iya.

"Aku ngigaka nuan chunto iya, nuan ngaga iya nyadi gerunung amat!"

"Nyamai amat nuan nih. Uji enti aku enda tealahka babi selunsinnya?" Ku Gemuring.

"Uji enti aku enda mai nuan ngiga engkala?" Ku Bajik Amai.

"Au, au umbas mih nya. Diatu, uji sebut nama utai dikedeka nuan!"

Bajik Amai madahka niat ati iya. Sida deka beserara enda lama agi. Dikena sida ngingatka kaul, sida deka betukar sepasang gerunung. Gerunung lelaki segala deka disilih enggau enggi indu.

Gemuring deka ngaga sepasang gerunung sebaka munyi ke dipinta Bajik Amai. Iya ngiga orang ti landik senentang besi. Bisi berapa hari iya begiga, lalu bisi sekali iya tetamuka orang ti landik. Kereban ti dikena ngaga gerunung ukai besi ngapa, tang mih digaga ari temaga. Temaga nya alus, bechura kuning sereta perenching, lalu mansutka sering ti inggar taja mit. Sepengudah tembu digaga, lalu dibai Gemuring ke langkau umai. Seduai iya Bajik Amai betukar gerunung munyi ku sempekat seduai iya.

             "Anak kitai ila, enti siku indu siku lelaki sigi deka disabung jadi," ku Bajik Amai.

"Au, tu nadai ngelaban adat. Setuju!"

 

"Gerunung tu ila deka nyadika tanda sempekat. Kitai enda nemu, engka sepengudah beserara tu, kitai badu betemu agi?"

         "Ah, nama bejaku munyi nya?" Gemuring ngasaika alit ati ninga jaku iya.

         Seduai iya lalu besilih gerunung lalu dikemataka sida sebilik Tiong kendang enggau indai bungai. Bajik Amai enda ulih ngenatka ai mata iya agi. Iya bendar nyabak merap aka iya Gemuring. Sepengudah nya sida nadai betemu agi.

Amat nyata, sepengudah betaun. Lalu tujuh bulan pernama beganti, sida enda kala betemu dataika Gemuring nerima berita menyadi iya ti diau ba Gelung udah midang lebuh ngadaka anak indu ti naka pemajik. Anak iya idup, tang indai iya udah midang lelang badu pulai agi.

         Tang jerita buah engkala, selusin babi enggau betukar gerunung mengkang dikingatka iya belama. Iya sigi enda mungkar danji tuchi entara seduai menyadi. Anak seduai ila sigi disabung jadi enti ada siku lelaki enggau siku indu.(BERSAMBUNG)