Novel Keling Kumang dalam Bahasa Iban (12)
6
Ngayap
SEKADAU NEWs - SEKADAU:Ba malam ti petang sereta panchar api kelasau, rumah panjai Gelung baka ti betanda.
Genap bilik rumah panjai nya ngembuan pemanjai sereta pemesai enam meter. Rumah panjai nya udah puang, tikai ti anchau mega udah digulung sereta ditaruh ba sadau.
Baka rumah panjai bukai
mega, rumah panjai Gelung mayuh bilik. Taja sida serumah, tang orang rumah
panjai ti diau ba dalam nya enda sepeneka tama ngagai bilik bukai. Bisi atur ti
meseti dititihka sida, ketegal genap bilik bisi pengidup kediri.
Sida serumah idup bebasaka
pangan diri, bekunsi pemakai sereta betulung enggau pangan diri. Reta dikunsi
meseti dikena begulai tang tetap bisi pengidup ba bilik diri empu. Taja pia sida sigi bisi ngembuan tanah ti
enda ulih dikachau orang bukai.
Pangking endur tinduk nya
palan ti enda sepeneka orang tama. Iya dipitak ngagai dua begian iya nya bilik
atas enggau bilik baruh. Pangking atas bisi geregar, lalu pangkin atas mega
bisi geregar atas. Bala anak tinduk ba pangking baruh, orang tuai tinduk ba pangking
atas.
Enti
tama ngagai pangking anak dara sigi disangka ngayap. Enti orang ditangkap
ngayap, sida deka dibai ngagai ketuai, udah nya sida deka diukum jadi ngena
adat.
Bilik sida sigi nadai pangking endur bala
temuai datai, semina palan puang tauka ba ruai bisi siti sukut ti diberi tikai
endur temuai tinduk. Ba atas digantungka kibung.
Dia mih endur Keling enggau Laja tinduk malam nya. Kumang tinduk ba pangking
iya empu.
Dlam pengidup bansa Iban, sida bisi siti adat ti suah dikereja iya nya disebut “ngayap”, lalu ba pengawa nya siku orang bujang ulih ngusung rumah tauka bilik peninduk indu dara maya malam hari ketegal deka bekelala lalu mantaika pengeran diri.
Maya ngayap tu mih timpuh lelaki enggau indu bekelala enggau pangan diri.
Lalu timpuh ti diberi ngagai bala lelaki endur sida ngayap iya nya sepenyuah
tiga hari.
Tang dalam
adat tu terang, maya timpuh ngayap nadai dikemendarkan beleman enggau pangan
diri. Tuju ngayap sigi dikena bekelala enggau pangan diri lalu dikena bala
entua ngelala lelaki ti deka nyadika menantu sida.
Sepemanjai
maya ngayap, enti lelaki nya bisi tanda jai baka kasar, enda bedulika orang
bukai sereta rua, pengawa jadi melaki bini enda dipenyadi. Enti seduai iya
setipak enggau pangan diri lalu dikemendarka ari bala lelaki enggau indu,
seduai iya deka neruska ngagai rengat “nanya indu”.
Dalam adat
Iban, nanya indu tu siti pengawa dikereja sepengudah ngayap, maya nya mih bala
ari lelaki minta pemendar ari bala indu sebedau seduai iya deka melah pinang.
Kenyau
ari pengawa ngayap, nukuka indu, nanya indu dataika melah pinang sigi nuju
Bujang Sebalu ketegal iya mih tuai bilik enggau tuai rumah. Pengawa melah
pinang mujur enti udah nitihka adat. Dalam pengawa melah pinang, genap atur
udah nitihka adat. Maya nya umur Keling baru 19 taun, Kumang dua taun biak ari
Keling.
Tengah malam nya mih jam ti
dianti. Pengawa ngayap nya sigi chara dikena ngelala adat basa ti ngujungka
pengawa nya lalu diatur ngena adat. Sapa bujang ti tama ngagai bilik indu dara
maya tengah malam nya? Nya mih maya ti ngasuh ati keketap lalu gegetar. Baka
bungai chura mansau ti ditegu jari lalu mali nyadi tangkai pengerindu.
Nadai kuasa ti ulih nagang
jari Keling nyilakka pintu bilik kumang. Nadai antu pala ti digantung ba
bedilang lalu ngasuh ati iya takut.
Keling nemu. Taja pan iya
agi biak, tang iya nemu kuasa ti bisi ba antu pala. Genap pala sigi bisi
dikembuan semengat iya empu. Pengelebih Keling senentang nya sigi dipurihka ari
peturun sida iya.
Ati
iya ngasaika bisi utai nyelai. Kada enda bisi orang begedika iya. Tauka bisi
orang ninding iya.
Iya pan lalu muka lupung, iya belubah mansutka “batu lichin”, pengaruh ti diberi bala antu ketegal sida enda dibunuh Keling. Taja pan maya nya Keling madahka enda beguna pengaruh ti diberi bala antu, tang iya tetap ngambi nya. Engka bisi guna jemah ila.
(BERSAMBUNG)