3
Nurun ari Langit
Musin orang nebang kayu baru udah tembu...
Maya musin nebang,
ninting hari ninga munyi beliung bekeretuk natuk pun kayu.
Munyi kayu keserap
rebah baka munyi angin puting beliung ti datai. Tanah asaika beganyang maya
kayu rebah ngempas ba tanah. Kayu ti udah rebah ditunu nyadika baja tanah.
"Tua tu nadai pengawa agi ditu. Aram
tua nurun ngasu ke menua kin," Ku Laja mai Keling. Laja enggau Keling tu
serambau, betunggal lalu segulai bemain kenyau ari mit. Dini Keling, dia mih
Laja. Dini Laja, dia mih Keling.
Baca sambungan sebelumnya Novel Keling Kumang dalam Bahasa Iban (3) Rumah panjai Panggau Libau tu ba palan ti
manah, tunga ke atas bisi tanjung ba baruh kaki bukit. Nya mih kebuah menua
sida seruran diberi jereki taja musin kemarau panjai. Sida ke diau ba kaki
bukit enggau ba tebing sungai meri pejuluk ngagai menua Panggau Libau nya menua
ba langit laban sida ngembuan pengelebih ari orang ti diau ba menua bukai.
"Au, aku ngasaika kenya mih!" Keling
ngasaika diri bulih bakih ti ulih enggau iya ngasu. "Lama sumpit tu enda
dikena. Peda nuan batang iya nya nyau bekulat.
Keling murus batang sumpit iya ti digaga
ari kayu tebelian. Sumpit nya tan sereta bekilat. Tang enti lama enda dikena
iya deka bebali chelum lalu bekulat.
"Nadai kebuah ti berat tua nurun ari
Panggau ke menua bukai semina rindu ati" Laja udah mendingka jaku tunduk
apai iya. Mimit pan iya enda nemu niat apai iya Jelayan ti deka manjuk Keling.
Pintu penama Jelayan manjuk Keling nengah anak iya, alus sereta enda berupai
chara iya.
"Nitihka
jerita, mayuh indu dara bajik ba menua din. Sida diau ba rumah panjai baka
kitai".
"Pia?"
Tanya Keling deka nemu pengamat. Baka indu dara ti malu, ati iya bisi berasai
gaga.
"Enti nitihka tusui apai aku
mih," Pia ku Laja madahka Keling. " Sida ulih mali mua nitihka maya.
Ulih mali nyadi rusa, tau mega mali nyadi bunsu antu.
Keling majak gagit. Ehm...enti
munyika ditusika Laja, amat ukai jerita pengingat tuai aja mih nya.
Iya empu kala meda rusa nya. Tang udah nya iya
bisi pengasai enda andal, amat kini utai dipeda iya, tauka semina mimpi? Amat
rusa kini, tauka bunsu antu?
“Nama kebuah nuan tegenung? Nama
bisi enda ngena utai disebut aku?" Ku tanya Laja alit ati.
Keling
baka ti tama ngagai menua bukai. Taja pan enda kala betemu, tang iya ngembuan
pengasai indu ti mandi ba pendai ukai rusa nyaru diri tang amat mensia lalu
ukai bunsu antu tauka antu.
Ati
Keling keran deka nemu senentang bunsu antu ti bajik nurun mandi ke pendai.
Perkara nya ti mai dua iku nembiak lelaki ke baru berangkat bujang nurun nuju menua
mensia. Tumu pagi buta sebedau manuk engkukuk seduai iya udah baum nurun ari Panggau
Libau.
***
Rumah panjai Panggau Libau jauh ari
tebing danau tang enda ga semak ba lebak. Amat panjai. Bala aki ini menya ti
ngatur sereta nyadi tukang udah ngena pengelandik ti tinggi maya ngaga rumah
panjai nya. Pemanah sereta perengka dikena udah diserakup nyadi siti.
Kayu ti dikena nyadika tiang semua
ari kah tebelian. Engka beratus taun kini umur tebelian nya. Diameter kayu
tebelian nya engka lebih ari 40 sentimeter, chelum bekilat, dedegi tegap ba
atas tanah nyukung rumah panjai sida.
Ngembuan peninggi tiga meter sereta didirika
ba atas tiang panchang tebelian, rumah panjai dipeda tegap bebendang ari pendai
ti landai.
Lebuh ngaga rumah nya, pekara
senentang diserang jelu siga, indu utai ti bisa sereta jelu ngapa udah dikira
magang. Maya malam hari, tangga peniki ke bilik ditungkupka. Anang ke jelu,
munsuh pan enda ulih tama.
Maya nya musin kemarau. Mayuh pun
kayu ti meragai enda chukup ai. Tang bisi sepun pun kayu ti ngembuan daun
gadung lalu daun iya pan agi mayuh. Urat kayu nya agi ngerekar ba tanah nginsap
ai ba siti sungai ti agi anyut ba menua nya.
Nitihka jerita ti ditusi ari mulut ke
mulut, ai sungai nya enda kala langkang laban penatai ai sungai nya ari munggu
bukit Bejuah. Lalu menua Panggau Libau sigi seruran bisi teritis ai ari bukit.
Sepun kayu ti seruran gadung nya
diberi nama "kayu kara". Lebuh maya nya, menua ti diayung kayu kara
naka penyelap. Nya mih kebuah mayuh orang mandi enggau nyauk ai ba baruh pun
kayu nya. Sida nyauk ngena ngenuk ti digaga ari buluh sepemesai betis sereta beruas
panjai tauka ngena labu tuai.
Taja mayuh mensia mandi sereta nyauk
ba sungai nya, bala burung mimit pan enda takut sereta siga. Bala burung naka
pengaga ba atas pun kayu kara, bekechiap, engkechit ari dan siti ngagai dan
siti ketegal deka ngiga pemakai ba pun kara nya. Naka penyamai pengidup bala
indu utai, idup nadai utai ngeruga, enda bumai tang ngetau. Sida mimit pan
nadai ngembuan pengirau ngenang hari pagila ti deka datai. Nadai kala bisi
pengirau senentang nama utai ti deka nyadi.
Keling enggau Laja beradu deka nurun
ari Panggau Libau nuju menua mensia. Baka bala nembiak ke baru berangkat bujang
ti bukai mih seduai iya nyikap diri enggau kereban kena ngasu. Keling ngena
gari ngasu baka orang Dayak. Lengan iya berupai dipeda besigul. Amat tegap iya!
"Kitai ngasu lalu meda baka ni
mua bala indu ba menua din. Enti nitihka tusui apai aku, naka pemajik indu sida
din. Ngarapka kita ulih nengkilaka sida mandi ba pendai," ku Laja ngapi
sida.
"Ah, nuan tu ngasuh layap! Nya
semina jerita tuai," ku Keling.
"Enda aka," ku saut Laja.
Umur seduai iya semina bida tujuh hari aja.
"Aku
amat arap sida sigi nyengenda ayan!"
Seduai iya bejimat nurun ngagai
menua mensia. Keling berupai amat baka bujang berani. Maya iya baru berangkat
bujang menya, tubuh iya sigi udah besigul. Sumit iya mipis melintang ba mulut,
kening iya tampak berupai ngayanka iya tegar. Tulang kuyu Keling nambahka
penyigat mua iya sereta ngayanka pengering sereta pemanah budi basa iya.
Selapuk iya dirias ngena bulu
enggang. Punggung iya nyangking duku, belakang iya ngema lupung. Perengka
dikena iya nyimpan kereban diukir sereta dirias dengan chura ti naka pemadas.
Ba dalam lupung disimpan batu api, getah tekalung, mata sumpit, pinang enggau
daun sirih. Lalu ketegal nya pengawa ngasu, seduai iya nadai mai pengaruh
sereta dinding bulu ba dalam lupung.
Seduai iya enggai ditemu orang
penurun, kelebih agi apai enggau indai sida. Keling enggau Laja nurun ari rumah
panjai Panggau Libau enda ari tangga.
Ba siti sukut menua Panggau Libau
bisi sepun rutan pulur. Kering sereta ulih dikenaka tiang tauka nyimpai
tangkin. Rutan Pulur sigi ditanam ba tebing rumah panjai Panggau Libau sereta
balat nyerangkap ba pun kayu. Ari nya nya mih Keling enggau Laja nurun.
"Nasit nadai siku orang
nemu!" Keling berasai gaga laban pengawa keterubah iya nurun ngasu mujur.
Seduai iya ngejangka Panggau Libau, apai indai sereta sida serumah agi bedau
dani ari mimpi.
Mata Laja terang. "Aram kin
tua!" iya nunjukka tunga menua Gelung ti dipeda ayas dibalut ambun tumu
pagi. Kira pejalai sehari mih. Tang sida enda nuju kia laban jelu siga enda
idup ba menua orang. Ba menua nya semina bisi mensia bajik ti disebut indu. Nya
mih ti deka dipeda sida.
"Jampat Keling!" Nama utai
diperatika nuan ba rumah panjai Gelung? Kitai tu berumban sebedau ditemu orang.
Keling ngasaika bisi utai nyelai ba
menua Gelung. Tang laban iya enda kala nemu nama utai dikemisi ba Gelung, Keling
empu pan enda nemu utai ba dalam pikir iya.
Baka kerbau diachuk idung, iya nitihka jaku
Laja. Lalu Nurun mih seduai iya ninggalka rumah panjai Panggau libau. Sida
ngasu lalu deka nemu keni gaya mua bala indu dara ba menua mensia. (BERSAMBUNG)
