Novel Keling Kumang dalam Bahasa Iban (9)
5
Gerunung Engkala
SEKADAU NEWs - SEKADAU: Menya semina sepintu langkau umai ti dientakka ba menua nya, tang diatu udah nyadi rumah panjai. Rumah panjai Gelung tu endur Kumang diumbung kenyau iya agi mit. Ba ditu mih, ba bilik tu. Enda berasai, udah 17 taun iya ditinggalka indai. Kumang suah nanyaka keni mua indai iya. Iya deka amat merap indai iya.
"Baka pinang dibelah
dua mua seduai indai nuan," saut Bujang Sebalu ngagai anak dara ti udah
majak besai.
"Ah, apai!" Kumang
ngelimpangka randau seduai iya. Iya nemu apai iya sinu lebuh ngenang senentang
indai iya. "Aku minta ampun apai!"
Kumang bendar ngelantangka ati apai iya. Keni ke enda! Ngenang kisah indai baka ti mai apai iya pulai ngagai penusah menya. Bujang Sebalu agi ingatka sintak seput penudi sereta sintak seput terubah bela serebak datai. Idup enggau mati baka ti nadai betakah jam.
Maya nya, Bujang sebalu
ngasaika nyamai agi enti iya disabakka begulai enggau Bajik Amai (indai Kumang).
Tang maya nya mayuh bala ti datai merindang iya. Mensia ti dikingatka iya meri
jaku perindang maya nya iya nya Gemuring, menyadi Bajik Amai.
Lebuh
nempik bau iya, ipar ti baka bakih enggau iya begigaka buah empelam ba babas
enda jauh ari menua Juar Gembar bejaku munyi tu " Anang kelalu balat tusah
ati. Leka ti mati deka tumbuh baru. Enti leka padi enda labuh ke tanah, iya
sigi nyadi Seleka. Tang enti iya mati, iya deka mansutka asil ti melimpah ruah.
Nya mih pengepun perintah menua Panggau Libau.
Jaku
ari ipar iya nya ti ngasuh Bujang Sebalu enda kelalu merampau. Enda salah kitai
ngenang orang ti dulu midang, tang nyaga orang ti agi idup mega deka dikira.
Bujang Sebalu kelalu sayauka bini iya Bajik
Amai ti lesi maya ngadaka Kumang ketegal mayuh darah lenyau. Maya nya, nadai
siku manang ti ulih ngetuka darah ti pansut kelalu mayuh seretai enggau pengada
anak iya.
“Luan ditanya, kemudi ti nyaut,” Ku kumang
nguji ngelimpangka ati apai iya. Kumang mai apai iya nyaut entelah.
"Iku ukui! " Ku
saut Bujang Sabalu.
Anak
dara enggau apai iya ti udah ditinggalka indai sereta bini lebih 20 taun nya
pan sama ketawa. Orang kelia ti ngembuan pengidup ba tikas ti tinggi, sida
ngena jalai jaku baka ti beentelah lebuh berandau enggau pangan diri. Sida enda
bejaku enggau terang, tang reti iya amat terang. Sida ngena jaku banding
ninting hari.
Taja bida umur 20 taun antara Kumang enggau Bujang
Sebalu, seduai baka diri menyadi. Umur Bujang Sebalu 40 taun tang iya agi
kering sereta sigat. Tang bai pengerindu sereta penyayau iya ngagai Bajik Amai,
tuai rumah nya milih jalai idup bujang dataika tuai.
Lebuh
meda mua Kumang, iya sigi memuaka niang bini iya. Mua sebaka baka pinang
dibelah dua.
Dalam
timpuh ti deka datai, Kumang deka diambi nyadika bini orang bujang. Iya deka
diambi sereta ditikika ngagai rumah sida ba Panggau Libau. Ba tangga rumah
panjai Panggau Libau, iya nya mua bilik Keling sida deka ngatur pengawa melah
pinang.
"Apai,"
Ku Kumang. " Ngemalatu, nuan enda kala nusika aku senentang jalai pengidup
indai.
Bujang Sabalu tegenung. Lama
iya enda bemunyi.
Ai mata labuh ari mata iya.
Ati iya asaika dicharik ngenang pengingat lama. Tang iya enda ulih lemi ba mua
anak dara iya.
"Nama dih apai?" Ku
Kumang nanya lalu bejalai semak ngagai apai iya.
Iya ngendas ai mata tudah apai.
"Ehm, enda ngawa. Nuan
amat deka ninga jerita senentang pengidup indai nuan sereta keni paras mua iya?"
Kumang nagunka pala. Iya
duduk ba padung lalu mendingka jerita ari apai iya. Bujang Sebalu lalu ngerintaika
jerita pengidup bini iya. Jerita ti didinga iya ari niang bini iya Bajik Amai.
Kelia, bisi sebuah rumah
panjai ba Gelung ti bepun ari sigi langkau umai. Orang Desa iyanya siti
ari pampang bansa Iban ti nyebut langkau ngagai langkau umai.
Lalu ba siti menua, bisi sebidang
umai ti gadung utai tumbuh dia. Bisi padi, jagung, sereta mayuh macham lauk daun
babas ti ke bukai; ba palan nya bisi sepintu sida sebilik diau mendam dia. Sida
sebilik nya bisi 7 iku diri menyadi. Enam ari sida tujuh iku nya indu magang,
semina siku aja lelaki.
"Aram
kitai ke ujung umai kin bujang ngiga buah lalu bemain," Ku menyadi bunsu
ari tujuh sida menyadi. Bajik Amai mih ti pengambis mentas, iya ti bunsu sereta
pengambis bajik ari menyadi sida ke bukai.
"Au, aku pan lama mih
enda makai buah,” Ku saut Gemuring.
Iya anak ti lumur empat sereta
siku aja lelaki. Iya anak Tiong Kandang enggau Indai Bungai ti tetengah sida
semenyadi.
Jeman kelia, sigi udah ke peneleba
bansa Iban bemalam ba umai lalu ninggalka rumah panjai enda lama. Kebuah pia,
laban sida enggai ngemasau hari dikena kelang kelut pulai ke rumah panjai lalu
nurun ke umai. Ari nya awak sida gawa enda dibasau lalu dikena ngereja pengawa
bumai sereta mansutka asil ti melimpah ruah.
Hari udah tengah hari, mata panas udah mupuk ngalih, seduai menyadi nurun ke tisi umai deka ngiga buah babas. Ke bendar mayuh buah babas bukai, tang seduai iya deka ngiga buah engkala.
Kelimpah ari asai iya ti nyamai, engkala mega dikena Gemuring ngaga gerunung ti deka disangkingka ba menyadi biak iya baka pemajik bunsu Petara ari langit. (BERSAMBUNG)